சென்னை, மே 24: மாநிலங்களவைத் தேர்தலில் 2 இடங்களில் போட்டியிட அ.தி.மு.க. முடிவு செய்துள்ளதாக தெரிகிறது.
மாநிலங்களவையில் பதவிக் காலம் முடியும் உறுப்பினர் இடங்களுக்கான தேர்தல் ஜூன் 17-ம் தேதி நடைபெறுகிறது. தமிழ்நாட்டில் இருந்து 6 உறுப்பினர்களைத் தேர்வு செய்யப்பட உள்ளனர்.
இப்போது சட்டப்பேரவையில் கட்சிகளுக்கு உள்ள பலத்தின் அடிப்படையில் தி.மு.க. கூட்டணி 4 இடங்களையும், அ.தி.மு.க. கூட்டணி 2 இடங்களையும் கைப்பற்ற வாய்ப்புள்ளது.
அ.தி.மு.க. அணியில் ஒரு இடத்தை அ.தி.மு.க. தன் சொந்தப் பலத்தின் மூலம் கைப்பற்ற முடியும். இன்னொரு இடத்தை மார்க்சிஸ்ட் கட்சி, இந்திய கம்யூனிஸ்ட், ம.தி.மு.க. ஆகிய தோழமைக் கட்சிகள் ஆதரவளித்தால், அ.தி.மு.க. வெல்ல முடியும்.
இதற்கிடையே அ.தி.மு.க. அணி வெற்றி பெற வாய்ப்புள்ள இரண்டாவது இடத்தில் போட்டியிட ம.தி.மு.க. பொதுச் செயலாளர் வைகோ, இந்திய கம்யூனிஸ்ட் கட்சி மாநிலச் செயலர் தா.பாண்டியன் ஆகியோர் முயற்சிகள் செய்வதாக செய்திகள் வந்தன.
இந்நிலையில், 2 இடங்களிலும் அ.தி.மு.க.வே போட்டியிட முடிவு செய்துள்ளதாக இப்போது செய்திகள் வெளிவந்துள்ளன. இப்போது பதவிக் காலம் முடியும் 6 உறுப்பினர்களில் 4 பேர் அ.தி.மு.க.வைச் சேர்ந்தவர்கள். 4 இடங்களை இழக்கும் அ.தி.மு.க.வால், தோழமைக் கட்சிகள் ஆதரவளித்தால் கூட 2 இடங்களை மட்டுமே மீண்டும் பெற முடியும். அதிலும் ஒரு இடத்தை தோழமைக் கட்சிகளுக்காக விட்டுக் கொடுப்பது கட்சியின் நலனுக்கு நல்லதல்ல என்று அ.தி.மு.க. கருதுவதாகக் கூறப்படுகிறது.
இந்த சூழலில், மாநிலங்களவைத் தேர்தலில் அ.தி.மு.க. வேட்பாளருக்கு ஆதரவு அளிக்கக் கோரி மார்க்சிஸ்ட் கம்யூனிஸ்ட், இந்திய கம்யூனிஸ்ட், ம.தி.மு.க. ஆகிய கட்சிகளுக்கு அ.தி.மு.க. தலைமை கடிதம் அனுப்பியுள்ளது. இதனை சிவகங்கையில் ஞாயிற்றுக்கிழமை நடைபெற்ற செய்தியாளர்கள் கூட்டத்தில் தா. பாண்டியன் உறுதிப்படுத்தியுள்ளார்.
அ.தி.மு.க. ஆதரவு கேட்டு கடிதம் எழுதிவிட்டதால், இனி தங்களுக்கு வாய்ப்பளிக்க வேண்டும் என்று இந்திய கம்யூனிஸ்ட், ம.தி.மு.க. ஆகிய கட்சிகள் வலியுறுத்தாது என்று கூறப்படுகிறது.
எனவே, நடைபெற உள்ள மாநிலங்களவைத் தேர்தலில் அ.தி.மு.க. 2 இடங்களில் போட்டியிடுவது உறுதியாகியுள்ளது. இது குறித்த அதிகாரபூர்வமான அறிவிப்பு வரும் 27-ம் தேதி சென்னையில் நடைபெறும் அ.தி.மு.க. செயற்குழுக் கூட்டத்துக்குப் பின் வெளியாகும் என எதிர்பார்க்கப்படுகிறது.
நன்றி: தினமணி
நன்றி: தினமணி
No comments:
Post a Comment